سؤال وجواب عن البشرة والشعرومشاكلهم

أنا عروسة وفرحي بعد 8 شهور.. هل الفترة دي كافية؟
طبعا الفترة دي كافية جدا إنك تعملي فيها ماسكات واستعدادات كتيرة، وبالنسبة للمناطق الحسّاسة فإحنا عملنا حلقة خاصة عن تفتيحها، واتكلّمنا عن الكريمات الطبية اللي بنستخدمها، ولسه هنتابعها بكريمات وماسكات طبيعية، وزي ما قلنا في الحلقة إننا بنستخدم الكريمات الطبية لفترة معينة، وبعد كده بنوقفها، ونبدل معاها بماسكات طبيعية.

ومهم جدا لأي عروسة إنها تاخد بالها مِن نفسها مش بس قبل الجواز، لكن كمان بعد الجواز، ويا ريت تتابعونا في الفترة اللي جاية؛ علشان هنقدِّم لكم مجموعة حلقات هنتكلّم فيها عن العناية الشخصية بعد الجواز، ومش بس العناية بالبشرة والشعر، لكن كمان هنتكلّم عن ترتيب البيت.



هل كريم بيتادين آمن إني أستخدمه للمناطق الحسّاسة؟
أوّل حاجة لازم نفرّق بين السمار الناتج عن التينيا وعن السمار الناتج عن عدم العناية الشخصية؛ يعني لو كان السبب هو الإصابة بالتينيا؛ ففيه كريمات مخصّصة لعلاجها، بتروّق الجلد وتفتّحه.

أما لو كان السمار ده ناتج عن عدم العناية الشخصية، يبقى نستخدم الليكوسيد والتروسيد مع كريمات مرطّبة والاهتمام بالعناية الشخصية، واستخدام الماسكات الطبيعية، ودي هنتكلّم عنها بالتفصيل في الحلقات اللي جاية.



هل المنظفات اللي بتستخدم للمناطق الحسّاسة جيّدة ولّا لأ؟
لو استعملتي منظف من ماركة معينة وحسّيتي إنها كويسة وبتجيب معاكي نتيجة؛ فمافيش مشكلة إنك تستخدميها، لكن لو ماعملتش نتيجة يبقى جرّبي الماسكات الطبيعية اللي قلنا عليها، واللي لسه هنتابعها في الحلقات اللي جاية.

وعامة لو جرّبتي أي منتج من أي ماركة ولقيتيها كويسة وبشرتك بتستجيب ليها وبتعالج المشكلة اللي عندك، بيقى استعمليها عادي، لكن ماتفضليش ماشية عليها على طول، وأهم حاجة الاهتمام بالعناية الشخصية، واستخدام الماسكات الطبيعية، وتابعونا في الحلقات اللي جاية، وهتلاقوا كل جديد إن شاء الله.



عندي مشكلة إني بشرتي مختلطة، وباعاني مِن المسام الواسعة والبثور السوداء؟
البشرة المختلطة مفيد ليها ماسكات السنفرة والملح اللي قلنا عليهم في الحلقات اللي فاتت، أما بالنسبة لمشكلة المسام الواسعة؛ فممكن تستخدمي مية البنجر، أو تذوّبي نشا في مية عادية، أو مية ورد، وكمان شرائح الطماطم من الحاجات اللي بتساعد على تضييق المسام، لكن لا بد من المواظبة على استخدام الماسكات الطبيعية اللي قلنا عليها مع الكريمات المرطبة، والاستمرار عليهم لمدة شهر، واستخدامهم بشكل منتظم.
عايزة ماسكات طبيعية لعلاج حبوب البشرة؟
كنا عملنا في بعض الحلقات ماسكات للحبوب؛ زي ماسك الميه والملح، وكمان زيت كبد الحوت مع عسل النحل بمقادير متساوية، ولو كانت الحبوب عندك واصلة لمرحلة الدمامل يبقى استمرّي على ماسك الميه والملح لمدة شهر، وبعدين اتبعيه بماسك زيت كبد الحوت مع العسل.



إيه أحسن الماسكات اللي ممكن أعملها لتقشير البشرة؟
زي ما قلنا إن مِن أسهل الحاجات علشان التقشير؛ هو ماسك الترمس والردة مع زيت الورد وعسل نحل، وكل اللي عليكي إنك تخلطيهم كلهم مع بعض بمية سخنة، كمان الليمون والبرتقال من الحاجات المفيدة جدا للبشرة؛ لأن نسبة فيتامين سي فيهم عالية، ولو الليمون بيتعبك يبقى ممكن تكتفي بالبرتقال.



أنا حامل.. وعايزة أعرف إيه أحسن طريقة لإزالة شعر الوجه؟
أحسن طريقة لإزالة شعر الوجه؛ هي الفتلة أو الشمع، وطبعا مش هينفع تعملي تفتيح أو تشقير أثناء فترة الحمل؛ لأن ده هيبقى مضرّ جدا ليكي.



هل الروتين اللي قلتي عليه لتفتيح البشرة هيناسب البشرة الحسّاسة، ولّا هيزوّد الحبوب؟
لو بشرتك فيها احمرار أو حساسية وعايزة تستخدمي ماسك التفتيح المكوّن من زبادي وعسل وليمون؛ فممكن تستغني عن الليمون، وتشوفي هيحصل إيه، ولو بشرتك حساسة أوي؛ فالأحسن إنك تخلّي نسبة العسل قليلة أوي وتشوفي النتيجة.



عندي حُفَر في وشي مِن آثار الجدري.. إزاي أعالجها؟
بالنسبة للحُفَر اللي بتحصل في الوجه مِن آثار الجدري؛ فهي مالهاش علاج من الحاجات الطبيعية، لكن ممكن تروحي لطبيب أمراض جلدية علشان تعملي سنفرة للجلد؛ سواء بأجهزة أو بمادة كيميائية معينة، وهتستمري في العلاج لمدة 3 شهور، وبتبقى مِن جلسة لجلستين في الأسبوع، كمان الميزوثيرابي داخل في علاج حاجات كتير، وممكن يستخدم في علاج حالتك.

وعامة لو الحفر اللي في بشرتك مساحتها صغيرة يبقى هتختفي بنسبة كبيرة، أما لو كانت موجودة على مساحة واسعة مِن وشّك وجسمك يبقى ممكن تختفي بنسبة مِن 70 : 80%، وبعد كده تكمّلي العلاج بالماسكات الطبيعية.

وزي ما قلنا إن اللبن والعسل والزبادي من الحاجات اللي بتنعمّ ملمس الجلد، وبتدّي نضارة للبشرة، ومع الاستمرار في العلاج الطبي مع الماسكات الطبيعية هتلاقي نتيجة كويسة، وهتحسّي بتحسُّن كبير جدا.



شعري مقصف من قدام.. ومش عارفة أعالجه إزاي؟
المشكلة دي بتحصل غالبا للبنات المحجبات؛ لأن الطرح بتعمل تقصيف في الشعر من الأمام.. وعلشان تعالجيه لازم تستخدمي كريمات وزيوت وكمان ماسك المايونيز -اللي قلنا عليه في حلقة من الحلقات اللي فاتت- مِن الحاجات الهايلة اللي بتعالج تقصيف الشعر وكمان بتغذّيه.



إيه هي أفضل أنواع الصبغات للشعر؟
فيه أنواع كتيرة مِن الصبغات؛ زي باليت، وجارنييه، وكوليستون، بس طبعا ضروري جدا إنك تعملي ماسكاتنا الطبيعية اللي قلنا عليها بعد الصبغة؛ علشان تحافظي على شعرك من الجفاف.



هل الصبار غلط لما يتحط على الشعر نفسه؟
الصبار ممكن يتخلط مع زيوت تانية؛ زي زيت جوز الهند، وزيت اللوز، وزيت الزيتون؛ لأن الصبار لوحده بيبقى شديد أوي على الشعر.